Það þarf að banna þessa kvikmynd

Það má samkvæmt stjórnarskrá ritskoða hitt og þetta ef það er almannaheill...

Svo, ég fór að hugsa:

Nú er það svo að það eru ekki beint skörpustu járnin sem eru valin til setu á þingi, og það fólk lærir allt sitt af sjónvarpinu. Skammt er að minnast stuttrar ræðu sem einn af þingmönnum VG, minnir mig, eða samfó, hélt um Lilju4ever.

Það er sænsk bíómynd full af bathos... whatever.

Hvað um það, þessi kvikmynd varð þingmanni tilefni til umhugsunar - setja þyrfti lög á landinu svo plott myndarinnar gæti ekki gerst hér á landi. (Já...)

Lengra aftur má benda á þann mæta mann Björn Bjarna, sem sótti helst innblástur í 24, sem eru þessir þættir með Sutherland, og fjalla um óðan fasista og ævintýri hans.

Svo ég nefni vel afmörkuð dæmi - en þetta er miklu víðtækara mál - td eru nýjustu viðbætur við vopnalög byggða á Hollywood, en ekki raunveruleikanum.

Hvar endar þetta? Ég veit það ekki, en hef illan bifur á málinu.

Þess vegna legg ég til að kvikmyndin "Attack of the killer tomatoes" verði stranglega bönnuð á Íslandi, til þess að enginn þingmaður eða ráðherra álpist til þess að horfa á þá mynd. Afleiðingarnar yrðu augljóslega skelfilegar.

Kreditlistinn væri ekki enn runninn upp þegar til væru drög að algeru banni við framleiðzlu eða innflutningi á tómötum, enda augljóslega skaðræðis-skepnur þar á ferð. Kvikmyndin segir það, svo það hlýtur að vera satt.

Slíkt bann hefði miður góð áhrif á neyzluvenjur íslendinga.

Á meðan maður er að því, þá væri flott múv að banna "Gremlins" í leiðinni, því þó það væri voða fyndið og allt það, þá er ég á því að best væri að spara fjármuni með því að vera ekkert að búa til viðbragðsáætlanir vegna Mogwaia sem snæða mat eftir miðnætti.

Á hinn bóginn væri sniðugt að senda þeim hverjum og einum Harry Potter safnið - bækurnar og myndirnar. Þá geta þeir sóað tíma sínum í að setja lög um hvað galdramenn mega og mega ekki gera, og gera þá engan steingrím á meðan.