Spáð í framtíðina

Það er desember, síðasti mánuður ársins. Hvað er þá betra en að spá í framtíðina?

Miðað við hvernig hefur gengið undanfarið ár, þá er best að vera ekki að nota einhver rök, því það sem hér gerist er ekkert rökrétt. Reyndar virðist mér sem allt sé að fara á rangasta veg, svo:

Á næsta ári verða þingkosningar. Til tilbreytingar verður það "ráðgefandi atkvæðagreiðsla" sem verður bara farið eftir ef það verður sitjandi stjórn til góða, annars ekki.

1-2 mánuðum seinna verður landið sett á uppboð vegna skulda sem ekki reynist unnt að greiða. Nubo kaupir það, og notar sem sumarbústaðaland fyrir ríka kínverja. Sem hafa þá fullt af sérvitru mannlífi til að skoða og kannski gefa brauð ef svo er undir.

Af útlöndum er það að segja að í S-Ameríku finnst Azteka dagatal, sem nær bara til 1952. Fróðir menn segja að þá hafi heimsendir í raun orðið, og allt sem fer fram nú sé bara ímyndun í okkur og tóm vitleysa.

Af öðrum stöðum er það að segja, að handan víðáttu himingeimsins, glápa á okkur rósemdarskepnur með mikið vit í kollinum og plotta smám saman gegn okkur.

Eða eitthvað svoleiðis.