Fer lognið of hratt fyrir ykkur?

Hér í eyjum líður varla sú vika að ég þarf ekki að leita að bílnum eftir að hann hefur fokið eitthvað til.  Það þykir hér eðlilegt.

Svo er ekkert tiltökumál þó það fenni aðeins - ég hef stundum þurft að skafa af framrúðunni eina 8 rúmmetra af snjó.  Það gerir maður með kreditkortinu - til þess er það.  Á bíl eins af vinnufélögunum myndaðist einu sinni jökull, sem fór ekki í burt fyrr en farið var að líða á ágúst.  Það böggaði hann bara ekki neitt.

Svo eru bara einhverjir lattelepjandi ilmvatnspeyjar í Borg Óttans að festa Landkrúserjeppana sína í tommu af snjó... sem er í sjálfu sér merkilegt afrek sé á það litið frá vissu sjónarhorni.

Svo heyrði ég af tuttugu bíla árekstri... það blessaða fólk hefur misst af köllun sinni í lífinu: að vera löggur í amerískri bíómynd. 

Mest þótti mér nú til koma vitleysinganna sem nöldruðu yfir því að þeir höfðu ekki verið varaðir við þessu blessaða merkis veðri.  Hér í eyjum metum við veðrið með því að horfa á það út um gluggann.  Okkur hefur ekki hugkvæmst að koma því þannig í kring að yfirvöld segi okkur hvort það er gott veður eða slæmt.  Okkur hér líkar betur að ákveða það bara sjálf.

Smá vindur... hvar á jarðkringlunni haldiði eiginlega að þið búið? 

Lítið lát á veðurofsanum