Kíkjum aðeins í pakkann:

Hey, ég er með skemmtilega hugmynd!

Kíkjum í pakkann sem allir eru alltaf að tala um!

Hann er hér, aðgengilegur sem PDF skjal: http://www.evropustofa.is/fileadmin/Content/Publications/PDFs/Lissabon-heildarskjal.pdf

Bara til þess að sanna að ég er ekki bara að bulla eitthvað.  lesið sjálf.  Þetta er frá evrópustofu.  Ríkið, semsagt.

 En byrjum:

 Þetta mun vera Lissabonsáttmálinn, sem er 324 blaðsíður eða 104.285 orð.  Ekki þéttskrifað semsagt, og bara efnisyfirlitið er 13 síður.

Svo koma upphafsorð, en þau eru leiðinleg, svo ég slepp þeim (ég bendi á að allur textinn er undir hlekk hér fyrir ofan):

 

I. BÁLKUR
ALMENN ÁKVÆÐI
1. gr.
(áður 1. gr. sáttmálans um Evrópusambandið) (1)
HINIR HÁU SAMNINGSAÐILAR koma með þessum sáttmála á fót EVRÓPUSAMBANDI, hér á eftir nefnt ,,Sambandið", sem aðildarríkin veita valdheimildir í því skyni að ná sameiginlegum markmiðum.
Þessi sáttmáli markar nýjan áfanga í ferli sem miðar að því að skapa nánari einingu meðal þjóða Evrópu þar sem ákvarðanir eru teknar á eins opinn hátt og eins nálægt borgurunum og kostur er.

Þessi sáttmáli og sáttmálinn um starfshætti Evrópusambandsins (hér á eftir nefndir ,,sáttmálarnir") skulu liggja til grundvallar Sambandinu. Þessir tveir sáttmálar skulu vera jafngildir að lögum. Sambandið skal leysa Evrópubandalagið af hólmi og taka við hlutverki þess. 

 

***

 

Hljómar eins og miðstýrt apparat.  Veit ekki hvernig þeir ætla að vera "nálægt borgurunum"... en, hey... 

 

***

 

2. gr.

Gildin, sem liggja til grundvallar Sambandinu, eru virðing fyrir mannlegri reisn, frelsi, lýðræði, jafnrétti, réttarríkið og virðing fyrir mannréttindum, þ.m.t. réttindum þeirra sem tilheyra minnihlutahópum. Þessi gildi eru sameiginleg aðildarríkjunum í samfélagi sem einkennist af fjölhyggju, banni við mismunun, umburðarlyndi, réttlæti, samstöðu og jafnrétti karla og kvenna.

 

***

 

Hvað er "fjölhyggja?" 

 

***

 

3. gr.
(áður 2. gr. sáttmálans um Evrópusambandið)
1. Markmið Sambandsins er að stuðla að friði, vinna að þeim gildum sem það byggist á og auka
velsæld þjóða sinna.
2. Sambandið skal leggja borgurum sínum til svæði frelsis, öryggis og réttlætis án innri landamæra,
þar sem fólki er tryggð frjáls för og viðeigandi ráðstafanir gerðar að því er varðar eftirlit á ytri landamærum, hælisveitingar, innflytjendur og forvarnir og baráttu gegn afbrotum. 

 

***

 

Réttlætis?  Hvað með jöfnuðinn þá?  Þið vitið, þessi almikilvægi jöfnuður?  Sem er ekkert réttlátur á nokkurn hátt, en pretty fokking jafn.

Ég sé alveg af hverju VG vilja ekki inn, ef þetta er í raun hluti af stefnunni, en ekki er öll nótt úti enn. 

 

***

 

3. Sambandið skal koma á fót innri markaði.

 

***

 

... lokað kerfi. 

 

*** 

 

Það skal vinna að sjálfbærri þróun Evrópu á grundvelli jafnvægis í hagvexti og verðlagi, afar samkeppnishæfu, félagslegu markaðshagkerfi, þar sem markmiðið er atvinna fyrir alla og félagslegar framfarir, ásamt öflugri umhverfisvernd og auknum umhverfisgæðum. Það skal stuðla að framförum á sviði vísinda og tækni.

 

***

 

Það er svo margt undarlegt þarna:

Hvað er "félagslegt markaðshagkerfi?" 

Og hvernig hyggjast þeir redda vinnu fyrir alla?   Þessir gaurar ættu að vera að ganga í bandalag við okkur, en ekki öfugt.

 

*** 

 

Það skal berjast gegn félagslegri útskúfun og mismunun og stuðla að félagslegu réttlæti og vernd,
jafnrétti kvenna og karla, samstöðu kynslóðanna og verndun réttinda barnsins  Það skal stuðla að efnahagslegri samheldni, félagslegri samheldni og samheldni milli svæða og samstöðu meðal aðildarríkjanna.

 

***

 

Er félagslegt réttlæti eitthvað annað en venjulegt réttlæti?  Hvernig?

 

*** 

 

Það skal virða þann auð sem er fólginn í margbreytileika menningar og tungumála og sjá til þess að
staðinn sé vörður um menningararfleifð Evrópu og henni gert hátt undir höfði.

 

***

 

Þeir hafa ekki lært af sögunni.  Eða deginum í gær, ef út í það er farið.  Hvernig fá þeir annars út að margbreytileg menning geti þrifist friðsamlega á einum og sama stað?  Svoleiðis gerist ekki nema undir stjórn Tító bandító.

 

*** 

 

4. Sambandið skal koma á efnahags- og myntbandalagi þar sem evra er gjaldmiðillinn. 

 

***

 

Nokkrir eru fyrir utan myntbandalagið.  Þeim gengur betur fyrir vikið, enda er menningin þar önnur svo og allar aðstæður aðrar. 

 

***

 

5. Í samskiptum sínum við umheiminn skal Sambandið halda á lofti gildum sínum og hagsmunum og vinna að þeim, sem og stuðla að vernd borgara sinna. Það skal stuðla að friði, öryggi og sjálfbærri þróun á jörðinni, samstöðu og gagnkvæmri virðingu meðal þjóða, frjálsum og sanngjörnum viðskiptum, útrýmingu fátæktar og verndun mannréttinda, einkum réttinda barna, sem og að því að þjóðarétti sé fylgt að fullu og hann þróaður áfram, þar á meðal að meginreglur sáttmála Sameinuðu þjóðanna séu virtar.

 

*** 

 

Ég spái því að þeim takist að koma sér í meiriháttar stríð vel innan 10 ára. 

 

*** 

 

6. Sambandið skal vinna að markmiðum sínum með þeim hætti sem samrýmist þeim valdheimildum sem því eru veittar í sáttmálunum. 

 

***

 

Við komum að þeim seinna.

 

***

 

4. gr.
1. Í samræmi við ákvæði 5. gr. fara aðildarríkin áfram með þær valdheimildir sem ekki eru veittar
Sambandinu í sáttmálunum.

 

***

 

Aftur:  komum að þeim seinna.

 

*** 

2. Sambandið skal virða jafna stöðu aðildarríkjanna gagnvart sáttmálunum og sjálfsmynd þjóða
þeirra, sem samofin er pólitískum og stjórnskipulegum innviðum ríkjanna, m.a. að því er varðar
sjálfsstjórn svæða og sveitarfélaga. Það skal virða grundvallarhlutverk ríkja, sem m.a. felst í því að
tryggja friðhelgi eigin yfirráðasvæðis, að viðhalda lögum og reglu og standa vörð um þjóðaröryggi.
Einkum er þjóðaröryggi alfarið á ábyrgð hvers aðildarríkis fyrir sig.

 

***

 

Við fáum ekki Amsterdam PD í heimsókn, semsagt.

 

*** 

 

3. Í samræmi við meginregluna um samstarf af heilindum skulu Sambandið og aðildarríkin aðstoða
hvert annað við að leysa af hendi þau verkefni, sem sáttmálarnir kveða á um, á grundvelli fullrar
gagnkvæmrar virðingar.
Aðildarríkin skulu gera hvers konar ráðstafanir, almennar eða sértækar, sem þykja viðeigandi til að
tryggja að staðið verði við þær skuldbindingar sem leiðir af sáttmálunum eða gerðum sem stofnanir
Sambandsins samþykkja.

Aðildarríkin skulu greiða fyrir því að Sambandið geti leyst verkefni sín af hendi og ekki gera neinar þær ráðstafanir sem gætu stofnað markmiðum þess í hættu. 

 

***

 

Hvaða afleiðingar mun þetta hafa?  Miklar og víðtækar.  Til góðs?  Veit ekki. 

 

Gerum hér hlé á athugun okkar á því sem í pakkanum er, höldum samt áfram seinna, þegar ég hef nennu.  Nema einhver annar hafi áhuga á að kíkja í pakkann, svona lið fyrir lið?