Kíkjum meira í pakkann

Þetta er ekki eins langt og ég hélt - það eru samsvörunartöflur aftast.  Við þurfum ekki að skoða þær.  Þeir sem halda annað, geta skoðað sáttmálann í heild sinni, en ég er með hlekk á hann hér annarsstaðar.

261 bls eftir.  Vindum okkur í þetta aftur:

 ***

 

22. gr.

1. Leiðtogaráðið skal skilgreina brýna hagsmuni og markmið Sambandsins á grundvelli þeirra
meginreglna og markmiða sem lýst er í 21. gr.
Ákvarðanir leiðtogaráðsins varðandi brýna hagsmuni og markmið Sambandsins skulu snúa að
sameiginlegri stefnu í utanríkis- og öryggismálum og öðrum sviðum aðgerða Sambandsins gagnvart
ríkjum utan þess. Slíkar ákvarðanir geta varðað tengsl Sambandsins við tiltekið land eða svæði, en
nálgunin getur einnig verið þemabundin. Tilgreina skal í þeim hver gildistími þeirra er og hvaða úrræði Sambandinu og aðildarríkjunum ber að leggja til.
Leiðtogaráðið skal taka einróma ákvörðun, að fengnum tilmælum frá ráðinu, sem hið síðarnefnda hefur samþykkt samkvæmt því fyrirkomulagi sem mælt er fyrir um gagnvart hverju sviði. Um framkvæmd ákvarðana leiðtogaráðsins fer samkvæmt málsmeðferð sem kveðið er á um í sáttmálunum.

 

***

 

2. Æðsti talsmaður stefnu Sambandsins í utanríkis- og öryggismálum, sem fulltrúi sameiginlegrar
stefnu í utanríkis- og öryggismálum, og framkvæmdastjórnin, sem fulltrúi annarra sviða aðgerða gagnvart ríkjum utan Sambandsins, geta lagt sameiginlegar tillögur fyrir ráðið. 

 

***

 

2. KAFLI
SÉRTÆK ÁKVÆÐI UM SAMEIGINLEGA STEFNU Í UTANRÍKIS- OG ÖRYGGISMÁLUM
1. ÞÁTTUR

ALMENN ÁKVÆÐI 

23. gr.
Framganga Sambandsins á alþjóðavettvangi, samkvæmt þessum kafla, skal samrýmast þeim meginreglum og miða að þeim markmiðum sem mælt er fyrir um í almennu ákvæðunum í 1. kafla og vera í samræmi við þau. 

 

***

 

Mikið vitna þeir í aðra kafla.  Þetta þyrfti helst að vera hyperlinkað saman.  En það fer forgörðum við prentun.

 

***

 

24. gr.
1. Valdheimildir Sambandsins á sviði sameiginlegrar stefnu í utanríkis- og öryggismálum skulu ná til allra sviða utanríkisstefnu og allra álitaefna er tengjast öryggi Sambandsins, þar á meðal mótunar í áföngum á ramma að sameiginlegri varnarstefnu er gæti síðar leitt til sameiginlegra varna.
Um sameiginlega stefnu í utanríkis- og öryggismálum gilda sértækar reglur og sérstök málsmeðferð.
Leiðtogaráðið og ráðið skulu móta stefnuna og hrinda henni í framkvæmd og taka um slíkt einróma
ákvarðanir nema sáttmálarnir kveði á um annað. Samþykkt lagagerða skal vera undanskilin þessu. Æðsti talsmaður stefnu Sambandsins í utanríkis- og öryggismálum og aðildarríkin skulu koma sameiginlegri stefnu í utanríkis- og öryggismálum til framkvæmda í samræmi við sáttmálana. Sérstakt hlutverk Evrópuþingsins og framkvæmdastjórnarinnar á þessu sviði er skilgreint í sáttmálunum. Dómstóll Evrópusambandsins skal ekki hafa lögsögu að því er varðar þessi ákvæði þegar frá er talin lögsaga hans til að fylgjast með því að farið sé að 40. gr. þessa sáttmála og til að sannreyna lögmæti tiltekinna ákvarðana, eins og kveðið er á um í annarri málsgrein 275. gr. sáttmálans um starfshætti Evrópusambandsins. 

 

***

 

Lögfræði.

 

***

 

2. Sambandið skal, innan ramma þeirra meginreglna og markmiða sem stýra aðgerðum Sambandsins gagnvart ríkjum utan þess, framfylgja, móta og koma til framkvæmda sameiginlegri stefnu í utanríkis- og öryggismálum, sem byggist á þróun gagnkvæmrar pólitískrar samstöðu meðal aðildarríkjanna, greiningu sameiginlegra álitaefna og æ meiri samleitni í aðgerðum aðildarríkjanna.

 

***

 

Kom þetta ekki fram í fyrri málsgreininni,bara orðað öðruvísi? 

 

***

 

3. Aðildarríkin skulu styðja stefnu Sambandsins í utanríkis- og öryggismálum á virkan og
afdráttarlausan hátt, í anda heilinda og gagnkvæmrar samstöðu og skulu hlíta aðgerðum Sambandsins á þessu sviði.
Aðildarríkin skulu vinna saman að því að efla og þróa gagnkvæma pólitíska samheldni sín á milli. Þau skulu forðast að gera nokkuð það sem vinnur gegn hagsmunum Sambandsins eða kynni að skaða áhrif þess sem afls í þágu samheldni í alþjóðasamskiptum.

Ráðið og æðsti talsmaðurinn skulu sjá til þess að þessum meginreglum sé fylgt. 

 

***

 

Ég sé íslensk stjórnvöld í anda styðja eitthvað af heilindum og í anda samstöðu.

 

***

 

 25. gr.
Sambandið skal framfylgja sameiginlegri stefnu í utanríkis- og öryggismálum með því að:
a) setja almennar viðmiðunarreglur,
b) samþykkja ákvarðanir þar sem fram kemur:
i. til hvaða aðgerða Sambandið mun grípa,
ii. afstaða Sambandsins,
iii. fyrirkomulag varðandi framkvæmd þeirra ákvarðana sem um getur í i. og ii. lið,
og með því að

c) efla kerfisbundið samstarf aðildarríkjanna um framfylgd stefnunnar.

 

***

 

Mér finnst ég vera búinn að lesa þetta allt yfir áður...

 

***

 

26. gr.
1. Leiðtogaráðið skal skilgreina brýna hagsmuni Sambandsins, setja því markmið og ákveða
almennar viðmiðunarreglur fyrir sameiginlega stefnu í utanríkis- og öryggismálum, þ.m.t. í málefnum sem tengjast varnarstarfi. Það skal samþykkja nauðsynlegar ákvarðanir í því skyni.
Kalli þróun á alþjóðavettvangi á slíkt skal forseti leiðtogaráðsins boða til aukafundar þess til að móta stefnumið Sambandsins með tilliti til slíkrar þróunar.

 

*** 

 

2. Ráðið skal móta ramma að sameiginlegri stefnu í utanríkis- og öryggismálum og taka
nauðsynlegar ákvarðanir um mótun og framkvæmd hennar á grundvelli almennu viðmiðunarreglnanna og stefnumiða sem leiðtogaráðið hefur skilgreint.
Ráðið og æðsti talsmaður stefnu Sambandsins í utanríkis- og öryggismálum skulu tryggja að Sambandið komi fram sem ein heild og að aðgerðir þess séu vel samræmdar og árangursríkar.

 

***

 

Ég vona að þeir séu búnir að þessu. 

 

*** 

 

3. Æðsti talsmaðurinn og aðildarríkin skulu koma sameiginlegri stefnu í utanríkis- og öryggismálum til framkvæmda og nota til þess úrræði sem aðildarríkin og Sambandið leggja til. 

 

***

 

27. gr.
1. Æðsti talsmaður stefnu Sambandsins í utanríkis- og öryggismálum, sem skal vera formaður
utanríkismálaráðsins, skal stuðla að þróun sameiginlegrar stefnu í utanríkis- og öryggismálum með
tillögum sínum og tryggja að ákvarðanir leiðtogaráðsins og ráðsins séu framkvæmdar.
2. Æðsti talsmaðurinn skal fara með fyrirsvar Sambandsins í málefnum er varða sameiginlega stefnu í utanríkis- og öryggismálum. Hann skal stýra pólitískum skoðanaskiptum við þriðju aðila fyrir hönd Sambandsins og tjá afstöðu þess á vettvangi alþjóðastofnana og á alþjóðaráðstefnum.
3. Æðsti talsmaðurinn skal njóta aðstoðar utanríkisþjónustu Evrópusambandsins við að sinna þeim skyldum sem í umboði hans felast. Þjónusta þessi skal eiga samvinnu við utanríkisþjónustu einstakra aðildarríkja og hjá henni skulu starfa opinberir starfsmenn viðeigandi deilda aðalskrifstofu ráðsins og framkvæmdastjórnarinnar, auk starfsmanna utanríkisþjónustu einstakra aðildarríkja sem lánaðir eru til starfa hjá henni. Kveðið skal á um skipulag og starfshætti utanríkisþjónustu Evrópusambandsins með ákvörðun ráðsins. Ráðið skal taka ákvörðun að tillögu æðsta talsmannsins, að höfðu samráði við Evrópuþingið og að fengnu samþykki framkvæmdastjórnarinnar. 

 

***

 

Þetta er hið mesta torf, og kemur íslendingum minnst við. 

 

Þetta er nóg í dag.  Skoðum afganginn seinna.