Lissabon-sáttmálinn, ennþá.

Ég gefst ekkert upp á þessu, bara 246 síður eftir:

 

***

 

VI. BÁLKUR
LOKAÁKVÆÐI
47. gr.

Sambandið skal hafa réttarstöðu lögaðila.

 

***

 

48. gr.

1. Heimilt er að gera breytingar á sáttmálunum í samræmi við hefðbundna endurskoðunarmeðferð.
Þeim má einnig breyta með einfaldaðri endurskoðunarmeðferð.
Hefðbundin endurskoðunarmeðferð
2. Ríkisstjórn hvaða aðildarríkis sem er, Evrópuþingið og framkvæmdastjórnin geta lagt fyrir ráðið
tillögur að breytingum á sáttmálunum. Slíkar tillögur geta m.a. miðað að því að auka eða draga úr
valdheimildum þeim sem Sambandinu eru veittar í sáttmálunum. Ráðið skal leggja þessar tillögur fyrir leiðtogaráðið og tilkynna þær þjóðþingunum.

 

***

 

Ég held nú að flestir nenni þessu ekki, þar sem auðveldara er að hunsa bara reglurnar.

 

*** 

 

3. Samþykki leiðtogaráðið ákvörðun um að taka breytingartillögurnar til umfjöllunar með einföldum meirihluta, að höfðu samráði við Evrópuþingið og framkvæmdastjórnina, skal forseti leiðtogaráðsins boða til fundar með fulltrúum þjóðþinganna, þjóðhöfðingja eða leiðtoga ríkisstjórna aðildarríkjanna, Evrópuþingsins og framkvæmdastjórnarinnar. Þá skal haft samráð við Seðlabanka Evrópu um breytingar er varða stofnanir á sviði peningamála. Á fundinum skulu breytingartillögurnar teknar til umfjöllunar og tilmæli til ráðstefnu með fulltrúum ríkisstjórna aðildarríkjanna samþykkt samhljóða, eins og kveðið er á um í 4. mgr.
Leiðtogaráðið getur, með einföldum meirihluta og að fengnu samþykki Evrópuþingsins, ákveðið að
boða ekki til fundar gefi umfang fyrirhugaðra breytinga ekki tilefni til þess. Leiðtogaráðið skal þá
skilgreina það umboð sem ráðstefna fulltrúa ríkisstjórna aðildarríkjanna hefur.
4. Forseti ráðsins skal boða til ráðstefnu fulltrúa ríkisstjórna aðildarríkjanna í því skyni að ákveða
með samhljóða samkomulagi þær breytingar sem gerðar skulu á sáttmálunum.
Breytingarnar öðlast gildi þegar öll aðildarríkin hafa fullgilt þær í samræmi við stjórnskipunarreglur sínar.
5. Ef fjórir fimmtu hlutar aðildarríkjanna hafa fullgilt sáttmála, sem breytir sáttmálunum, þegar tvö
ár eru liðin frá undirritun hans, en eitt eða fleiri aðildarríki hafa átt í erfiðleikum með að ganga frá
fullgildingu, skal vísa málinu til leiðtogaráðsins.

 

***

 

Fjórir fimmtu?  Þetta fæst aldrei einu sinni sent til leiðtogaráðsins. 

 

*** 

 

Einfölduð endurskoðunarmeðferð
6. Ríkisstjórn hvaða aðildarríkis sem er, Evrópuþingið og framkvæmdastjórnin geta lagt fyrir
leiðtogaráðið tillögur að endurskoðun á sumum eða öllum ákvæðum þriðja hluta sáttmálans um
starfshætti Evrópusambandsins, sem varða innri stefnur Sambandsins og aðgerðir á vettvangi þess.
Leiðtogaráðið getur samþykkt ákvörðun um að breyta öllum eða sumum ákvæðum þriðja hluta
sáttmálans um starfshætti Evrópusambandsins. Leiðtogaráðið skal taka ákvörðun einróma, að höfðu
samráði við Evrópuþingið og framkvæmdastjórnina svo og Seðlabanka Evrópu, ef um er að ræða
breytingar er varða stofnanir sem starfa á sviði peningamála. Ákvörðunin öðlast ekki gildi fyrr en
aðildarríkin hafa samþykkt hana í samræmi við stjórnskipunarreglur sínar.
Ákvörðun samkvæmt annarri undirgrein má ekki auka við valdheimildir þær sem Sambandinu eru
veittar í sáttmálunum.

 

***

 

Maður gæti allt eins reitt sig á að vinna í lottóinu, er það ekki?

 

*** 

 

7. Kveði sáttmálinn um starfshætti Evrópusambandsins eða V. bálkur þessa sáttmála á um að ráðið
skuli taka einróma ákvörðun á tilteknu sviði eða í ákveðnu tilviki getur leiðtogaráðið samþykkt
ákvörðun um að heimila ráðinu að taka ákvörðun með auknum meirihluta á því sviði eða í því tilviki.
Þessi undirgrein skal ekki gilda um ákvarðanir sem tengjast hernaðarstarfi eða eru á sviði varnarmála.
Kveði sáttmálinn um starfshætti Evrópusambandsins á um að ráðið skuli samþykkja lagagerðir í
samræmi við sérstaka lagasetningarmeðferð getur leiðtogaráðið samþykkt ákvörðun um að heimila að slíkar lagagerðir séu samþykktar í samræmi við almenna lagasetningarmeðferð.
Hvers konar frumkvæði af hálfu leiðtogaráðsins á grundvelli fyrstu eða annarrar undirgreinar skal
tilkynnt þjóðþingunum. Ekki skal samþykkja ákvörðun samkvæmt fyrstu eða annarri undirgrein ef
þjóðþing hreyfir andmælum innan sex mánaða frá dagsetningu slíkrar tilkynningar. Leiðtogaráðinu er heimilt að samþykkja ákvörðunina ef enginn hreyfir andmælum.
Leiðtogaráðið skal taka ákvarðanir samkvæmt fyrstu og annarri undirgrein einróma, að fengnu samþykki Evrópuþingsins sem fengið er með stuðningi meirihluta allra þingmanna. 

 

***

 

49. gr.

Sérhvert Evrópuríki, sem virðir þau gildi sem um getur í 2. gr. og einsetur sér að stuðla að þeim, getur sótt um að gerast aðili að Sambandinu. Tilkynna skal Evrópuþinginu og þjóðþingunum um slíka
umsókn. Umsóknarríkið skal senda umsókn sina til ráðsins, en það skal taka einróma ákvörðun, að
höfðu samráði við framkvæmdastjórnina og að fengnu samþykki Evrópuþingsins með stuðningi
meirihluta allra þingmanna. Taka skal tillit til skilyrða sem leiðtogaráðið hefur samþykkt að þurfi að
uppfylla vegna aðildar.
Skilmálar aðildar og sú aðlögun á sáttmálunum, sem Sambandið byggir á, sem slík aðild felur í sér, skulu byggjast á samningi milli aðildarríkjanna og umsóknarríkisins. Þann samning skal leggja fyrir öll samningsríkin til fullgildingar í samræmi við stjórnskipunarreglur sínar. 

 

***

 

Lásuði þetta?  Þetta var mikilvægt.  Sú næsta er líka mikilvæg, ef ekki mikilvægari:

 

***

 

50. gr.

1. Sérhvert aðildarríki getur ákveðið að segja sig úr Sambandinu í samræmi við stjórnskipunarreglur
sínar.
2. Aðildarríki, sem ákveður að segja sig úr Sambandinu, skal tilkynna það leiðtogaráðinu. Í ljósi
viðmiðunarreglna leiðtogaráðsins skal Sambandið ganga til samningaviðræðna og gera samning við
viðkomandi ríki um það hvernig staðið skuli að úrsögn þess með hliðsjón af því hvernig
framtíðartengslum þess við Sambandið verður hagað. Samningurinn skal gerður í samræmi við 3 mgr. 218. gr. sáttmálans um starfshætti Evrópusambandsins. Ráðið skal gera samninginn fyrir hönd
Sambandsins og taka um hann ákvörðun með auknum meirihluta, að fengnu samþykki Evrópuþingsins.

 

***

 

Ég man ekki hvort hefur reynt á þessa grein áður.

 

*** 

 

3. Sáttmálarnir hætta að taka til viðkomandi ríkis á gildistökudegi samnings um úrsögn eða, að
öðrum kosti, þegar tvö ár eru liðin frá tilkynningunni sem um getur í 2. mgr., nema leiðtogaráðið ákveði einróma, með samþykki viðkomandi aðildarríkis, að framlengja þetta tímabil.
4. Sá sem á sæti í leiðtogaráðinu eða ráðinu fyrir hönd aðildarríkis sem segir sig úr
Evrópusambandinu, skal, að því er 2. og 3. mgr. varðar, ekki taka þátt í umræðum leiðtogaráðsins eða ráðsins eða í ákvörðunum sem varða það.
Aukinn meirihluti skal skilgreindur í samræmi við b-lið 3. mgr. 238. gr. sáttmálans um starfshætti
Evrópusambandsins.
5. Óski ríki, sem hefur sagt sig úr Sambandinu, eftir því að ganga í það aftur gildir málsmeðferðin sem um getur í 49. gr. 

 

***

 

Hægt er að ganga í og úr sambandinu.  Sem ætti að gleðja íslenska áhugamenn um pólitík.  Samfó getur gengið inn þegar þeir eru við völd, allir hinir geta gengið úr því þegar þeir eru við völd.  Þannig getur gengið á 4 ára fresti þar til sambandið líður undir lok.

 

***

 

51. gr.

Viðaukar og bókanir við sáttmálana eru óaðskiljanlegur hluti þeirra.

 

***

 

Ágætt að hafa þetta með.

 

***

 

52. gr.
1. Sáttmálarnir gilda um Konungsríkið Belgíu, Lýðveldið Búlgaríu, Lýðveldið Tékkland,
Konungsríkið Danmörku, Sambandslýðveldið Þýskaland, Lýðveldið Eistland, Írland, Lýðveldið
Grikkland, Konungsríkið Spán, Lýðveldið Frakkland, Lýðveldið Ítalíu, Lýðveldið Kýpur, Lýðveldið Lettland, Lýðveldið Litháen, Stórhertogadæmið Lúxemborg, Lýðveldið Ungverjaland, Lýðveldið Möltu, Konungsríkið Holland, Lýðveldið Austurríki, Lýðveldið Pólland, Lýðveldið Portúgal, Rúmeníu, Lýðveldið Slóveníu, Lýðveldið Slóvakíu, Lýðveldið Finnland, Konungsríkið Svíþjóð og Hið sameinaða konungsríki Stóra-Bretlands og Norður-Írlands.

2. Gildissvæði sáttmálanna er tilgreint í 355. gr. sáttmálans um starfshætti Evrópusambandsins. 

 

***

 

Þessi grein mun óhjákvæmilega breytast í hvert skifti sem einhver gengur í eða úr sambandinu.

 

***

 

53. gr.

Sáttmáli þessi er gerður til ótakmarkaðs tíma.

 

***

 

54. gr.

1. Hinir háu samningsaðilar skulu fullgilda sáttmála þennan í samræmi við stjórnskipunarreglur
sínar. Fullgildingarskjöl skulu afhent ríkisstjórn Lýðveldisins Ítalíu til vörslu.
2. Sáttmáli þessi öðlast gildi 1. janúar 1993 að því tilskildu að öll fullgildingarskjöl hafi verið afhent
til vörslu, en að öðrum kosti fyrsta dag næsta mánaðar eftir að síðasta undirritunarríkið hefur afhent fullgildingarskjal sitt til vörslu. 

 

***

 

Af hverju ítalíu?

 

***

 

55. gr.

1. Sáttmáli þessi, sem gerður er í einu frumriti á búlgörsku, dönsku, eistnesku, ensku, finnsku,
frönsku, grísku, hollensku, írsku, ítölsku, lettnesku, litháísku, maltnesku, portúgölsku, pólsku,
rúmensku, slóvakísku, slóvensku, spænsku og sænsku, tékknesku, ungversku og þýsku, en allir þessir textar eru jafngildir, skal afhentur til vörslu í skjalasafni ríkisstjórnar Lýðveldisins Ítalíu og sendir hún ríkisstjórnum hinna undirritunarríkjanna staðfest endurrit.
2. Samkvæmt ákvörðun aðildarríkjanna má einnig þýða sáttmála þennan á hvert það tungumál annað sem hefur, samkvæmt stjórnskipan þeirra, stöðu opinbers tungumáls á öllu yfirráðasvæði þeirra eða hluta þess. Hlutaðeigandi aðildarríki skulu afhenda staðfest endurrit slíkra þýðinga til vörslu í skjalasafni ráðsins.
ÞESSU TIL STAÐFESTU hafa undirritaðir fulltrúar, sem til þess hafa fullt umboð, undirritað sáttmála þennan.

Gjört í Maastricht sjöunda dag febrúarmánaðar á árinu nítján hundruð níutíu og tvö.

 

***

 

Frumritið er langt og endurtekningasamt - ef maður kann öll þessi tungumál.

 

***

 

Látum fylgaj eina yfirlýsingu um ákvæði:

 

***

 

1. Yfirlýsing vegna ákvæða sáttmála Evrópusambandsins um grundvallarréttindi
Sáttmáli Evrópusambandsins um grundvallarréttindi, sem hefur bindandi réttaráhrif, er staðfesting á
þeim grundvallarréttindum sem eru tryggð í Evrópusamningi um verndun mannréttinda og mannfrelsis og leiðir af sameiginlegum stjórnskipunarhefðum aðildarríkjanna.

Sáttmálinn rýmkar ekki gildissvið laga Sambandsins umfram valdheimildir Sambandsins, með honum er ekki stofnað til nýrra valdheimilda eða verkefna Sambandsins og hann felur ekki í sér breytingar á valdheimildum og verkefnum, eins og þau eru ákveðin í sáttmálunum.