Svartir Englar

Svartir Englar er enn annar sósíal-realískur dramaþáttur sem er kynntur sem "sakamálasería."  Það var og.  Svona svipað eins og "Fótur er hugarástand," eða hvað hann nú hét þarna þátturinn um lögfræðinginn og allt dramað í kringum hann.

Þetta er ekki sambærilegt við sakamálaþætti neinstaðar - nema helst í Danmörku.  Skoðum til dæmis kanann: þeir hafa Law & Order, sem hefur gengið árum saman.  Það er fullkomin formúla: einhver er drepinn, svo koma tvær löggur sem segja brandara á meðan þeir komast að því hver gerði það, og svo fer bófinn í kerfið og er dæmdur.

Einfalt, ódýrt.

Bretar eru með helling af miklu betri þáttum: Morse, til dæmis.  Eða þessi þarna sem gerist í smábænum þar sem eru framin fleiri morð per kapita en í Kólumbíu.

Þjóðverjar voru með Derrick.  Nú eru þeir búnir að skifta honum út fyrir "Alarm Fur Cobra elf," sem er hægt að nálgast hér: http://rtl-now.rtl.de/cobra.php 

En við?  Sko, íslenskir glæpaþættir eru ekkert sambærilegir útlendum glæpaþáttum.  Þeir eru meira...

Hugsum okkur bara að Húsið á Gresjunni væri Íslenskur glæpaþáttur.

Já, sjáið fyrir ykkur Lauru Ingalls þar sem hún hleypur niður þessa brekku með grasinu.  Allt í einu: BANG!  Er hún skotin niður.

Allt hér eftir er í sauðalitunum: svart, hvítt og brúnt.  Allir gera sér grein fyrir að Laura Ingalls hefur verið plöffuð niður, en enginn gerir neitt í því.  Í stað þess er rifist um hver á að ná í krakkann í leikskóla.  Svo er mikið drama í kringum manninn á næstu gresju sem er mormóni og á tvær eiginkonur.  Svo dettur einn fóturinn af asnanum sem þau eiga.

Þetta gengur á í svona 10 þætti, eða þar til morðinginn verður þunglyndur af þessu öllu og játar.

Þannig væri Húsið á Gresjunni sem íslenskt glæpadrama.

Hvernig væri að skella inn eins og einum bílaeltingaleik, og kannski sprengingu?  Eða plottið gæti verið að morðinginn er geimvera eða eitthvað.  það er ekkert fútt í þessu eins og þetta er núna.

Athugasemdir

[Ásgrímur Hartmannsson, 5.10.2008 kl. 23:40]

Latibær er ágætis prógramm, ekki er það eftiröpun af neinu.  Annars var serían "Réttur er settur" besta þáttaröð sem Íslenskt sjónvarp hefur boðið uppá lengi.  Að vísu mjög stutt sería, bara einn þáttur... en þvílík snilld!